Über mi

Lieber spät als nie...

I cha hie nid schriibe, i sig scho sit i ä chlyni Hoseschiisserin bi gsi am Musige. Jo sicher, i ha scho immer gärn gsunge, bi i Gitarre- und Orgeleungerricht, aber nie mit dr Idee vo "darfs es Bitzeli meh si". Ou nei, d Vorstellig vor Lüt d singe het mir scho bim blosse Gedanke Angscht igjagt! I bi ganz es schüüchs, liisligs Meiteli gsi. Aber jetz, jetz hets mi packt. I möcht säge (singe) was i dänke...

2014 hani d`Idee gha, mire grosse Liebi Markus am Hochzyt äs Lied z`singe. Auso:

vor ä Compi hocke...google...Xangslehrer sueche...dr Patrick von Castelberg gfunge...Ungerricht näh...und...i bi dranne blibe! Jo, es het mir definitv dr Ärmu ine gnoh. Musig isch mi Seelewärmer und die perfekti Form, mini Gedanke und Gfüehl zum Usdruck z`bringe.

Aber i erschter Linie isch es ganz eifach d`Freud dra! Wenns jetz no es paari git, wo`s ou ä chly gfaut was i mache...de freuts mi umso meh und erfüllt mi mit grosser Dankbarkeit.

 jaana